في نظام الدولة الإسلامية من حق أهل الذمة إنهم يتعينوا في مناصب إدارية من نوعية"مناصب التنفيذ"ودي بتختلف عن المناصب المقتصرة على المسلمين اللي هي"مناصب التفويض"...يعني ممكن غير المسلم يكون وزير أو مسئول أو محافظ أو أي منصب تنفيذي طالما إن القيادة العليا لقائد مسلم..والكلام دة حتلاقيه في كتاب"الأحكام السلطانية والولايات الدينية"للإمام القاضي الفقيه أبوالحسن الماوردي .ودة كتاب يعتبر مصدر من أهم مصادر نظم الحكم في الشريعة الإسلامية..
ثانيًا: بعد فتح مصر..عمرو بن العاص رضي الله عنه كان معيّن أقباط في مناصب زي حكام مدن في مصر(زي العمدة كدة مثلا)ومسئولين عن جمع الجزية والخِراج..ومناصب أخرى متعلقة بالمحاسبات والدواوين وتنظيم الزراعة والحصاد وحساب موارد مصر..دة في عهد عمر بن الخطاب رضي الله عنه..يعني أكيد مش إجراء غلط شرعًا لأن دول صحابة أجلاء المفروض نقتدي بيهم..
ثالثًا: في ما يتعلق بالمناصب العسكرية: أهل الذمة زمان ماكانوش بيتولوا أي وظيفة عسكرية لأنهم كانوا بيدفعوا الجزية..الجزية دي مش عقاب مثلا لهم أو"كسر عين"بل هي-وفق الشرع-"مقابل حماية"..وعشان كدة في عهد عمر بن الخطاب رضي الله عنه لما تم فتح مدينة"حِمص"في سوريا على يد أبوعبيدة بن الجراح رضي الله عنه واضطر الجيش الإسلامي للانسحاب منها تاني أبوعبيدة رضي الله عنه أعاد لأهلها الجزية..وفي اتفاقية تانية بين أبوعبيدة رضي الله عنه وأهل مدينة مفتوحة إنهم يدفعوا الجزية فقط لو مش حيشاركوا في الدفاع الوطني..أما لو حيشاركوا فمش بيدفعوها...وبكدة يبقى الذمي من حقه إنه يتعين في الجيش والشرطة وبتسقط عنه الجزية طالما إنه بيشارك في الدفاع عن البلد..وبرجع أفكرك إن دة كان في عهد وعلى يد صحابة أجلاء أكيد ماكانوش حيخالفوا شرع ربنا..
بناءً عليه..فمع كامل احترامي لك..كلامك عن تحريم تعيين المسيحي في منصب رسمي هو كلام خاطيء..
لو عايز تطلع أكتر على نظام الدولة الإسلامية وعن وضع المسيحيين فيها اقرا الكتب دي:
-1-الأحكام السلطانية والولايات الدينية:أبوالحسن الماوردي.
-2-في الدولة الإسلامية:د.محمد سليم العوا.
-3-الإسلام كبديل:د.مراد هوفمان.
-4-أهل الذمة في مصر:د.قاسم عبده قاسم.
-5-مواطنون لا ذميون:فهمي هويدي.
-6-حضارة العرب:جوستاف لوبون.
-7-فقه الجهاد:د.يوسف القرضاوي.
-8-للدين والوطن:د.محمد سليم العوا.
-9-مسلمون وأقباط من المهد إلى المجد:د.جمال بدوي.
-10-منهج عمر بن الخطاب في التشريع:د.البلتاجي حسن.
-11-تاريخ الخلفاء الراشدين:د.محمد سهيل طقوش.
-12-تاريخنا المُفتَرَى عليه:د.يوسف القرضاوي
من كومنت وليد فكري
ليست هناك تعليقات:
إرسال تعليق